O Partido Comunista de España mostra a súa preocupación pola venda do 74% do capital de Alu Ibérica (a antiga Alcoa) ao Grupo Industrial Riesgo, apoiado pola empresa ucraína System Capital Management.

En 2019, tras longos anos de loita polo mantemento dos postos de traballo e o futuro da industria española, a empresa estadounidense Alcoa, do grupo financeiro BNY Melon, desprendíase das súas fábricas de Avilés e Coruña. A empresa adquirente sería Parter Capital, un fondo de investimento suízo, que sinalaba e segue afirmando que a súa filosofía é dotar á empresa de “unha perspectiva a longo prazo”.

Con todo, Parter Capital parece abandonar esta estratexia empresarial no caso de Alu Ibérica, vendendo o 74% do seu capital ao Grupo Industrial Riesgo, tras o que se atopa System Capital Management, a empresa do magnate ucraíno Rinat Akhmetov. Un empresario que fixo fortuna coa desnacionalización da época soviética e con privatizacións da época Yanukovych, grazas á súa proximidade co ex presidente ucraíno.

O Grupo Industrial Riesgo xa formara parte do concurso de venda en 2019, sen éxito. Resulta sospeitoso que agora Parter (un fondo de investimento, non debe esquecerse) proceda á venda do capital de Alu Ibérica a un dos competidores no concurso.

Compartimos a preocupación e a desconfianza dos traballadores de Alu Ibérica perante estas manobras de grandes financeiras e empresas multinacionais, máxime nun momento como este, no que a protección do tecido industrial existente é absolutamente imprescindible para avanzar no proceso de industrialización nacional.

O Partido Comunista de España sinala a necesidade de que a mesa de seguimento, convocada polo Ministerio de Industria para este martes, procure a continuidade dos postos de traballo e a industria electrointensiva en España. Resulta necesario que o goberno central garanta o futuro dun polo industrial estratéxico e de futuro para o país.

As cámaras municipais e os gobernos autonómicos afectados deben apoiar as reivindicacións dos traballadores de Alu Ibérica e esixir explicacións por esta venda. Sinalamos a tardanza do goberno da Xunta de Galicia e o Concello da Coruña, que días despois da venda non se manifestaron coa contundencia que a situación merece.

Este tipo de operacións demostran os perigos de deixar a industria estratéxica dun país en mans do capital privado. Os intereses das empresas financeiras e as presións pola deslocalización e abaratamento, manterán o perigo do desmantelamento industrial e o paro mentres non se opte por decisións máis contundentes. A única solución con garantías de futuro pasa pola titularidade pública das empresas estratéxicas.

Finalizamos mostrando a nosa solidariedade coas e os traballadores. Tras anos de precariedade e loita polos postos de traballo, unha nova ameaza se cerne sobre eles.

Trasladamos todo o apoio do PCE á loita das e os traballadores e as súas organizacións sindicais, que tras anos de precariedade e loita, ven unha nova ameaza, que o é para todas, sen dúbida xa no marco desta crise sanitaria.

LOITA OBREIRA, SOLIDARIEDADE E UNIDADE. INDUSTRIA E ENERXÍA PARA A VIDA DE TODAS.