O Comité Comarcal do Partido Comunista de Galicia en Ferrolterra denuncia a falla de rigor e criterio do goberno municipal do PP no Concello de Ferrol na programación das actividades de lecer estival, tras coñecerse o programa de "A Ruta do Lúpulo en Ferrol", enmarcada dentro da Feira da Cervexa e Foodtrucks que se celebra na Praza de Armas do 6 ao 9 de agosto.
Entre as actividades anunciadas figuran un "Concurso infantil «Pinta tu lata de cerveza»" (venres 7 e sábado 8) e un "Concurso infantil de chapas e lata de cerveza" (sábado 8 e domingo 9). Por se isto non chegase, programan tamén un obradoiro para rapaces baixo o epígrafe de "Cata e taller para cerveceros niños".
Baixo o brochazo eufemistico do "lúpulo" manipulan á infancia cara ó consumo de produtos alcohólicos.
Un exercicio de cinismo institucional
A menos que o concelleiro Arán López Martínez, agora sexa titular das áreas de Xuventude, Festas, Novas Tecnoloxías, Marca Ferrol e Promocion do Alcoholismo Infantil, está tardando en dar explicacións e ser cesado, porque o despropósito de promover-lo do consumo de alcohol entre nenos so pode ser froito dun descerebrado, do nulo esforzo ou a pura desidia.
Preguntámonos que consello técnico revisou esta programación e considerou adecuado mesturar público infantil coa promoción do consumo de alcohol.
Isto é sintomático e amosa con claridade a incompetencia dun goberno que se enche a boca falando de "familia" e "conciliación" cando lle convén, pero que despois é incapaz de garantir que as actividades dirixidas expresamente á familia e a infancia teñan un mínimo de coherencia e adecuación.
Dende o PCG en Ferrolterra esiximos:
- - A retirada inmediata das actividades infantís vinculadas directamente á promoción da cervexa dentro desta programación.
- - Unha explicación pública por parte da concellería responsable sobre os criterios de revisión e aprobación deste tipo de eventos.
- - O compromiso de que, no futuro, as actividades destinadas á infancia dentro da programación municipal de lecer estean claramente separadas de calquera promoción de produtos alcohólicos.
- - O cese fulminante do concelleiro responsable, Arán López Martínez, por ser un absoluto incompetente e pola xestión neglixente da súa área, incompatible coa protección da infancia, converténdoa de facto nunha auténtica "concellería de promoción do alcoholismo infantil".
O PP demostra, unha vez máis, que a súa xestión do lecer e da cultura en Ferrol responde máis á ocorrencias e ao escaparate que a un proxecto pensado con seriedade e responsabilidade cara á cidadanía, moito menos cara aos máis pequenos.
Comité Comarcal do PCG en Ferrolterra
